Fampianarana

Partagé sur :
• facebook

Tsy mbola voafaritra ny daty hiverenan'ny mpianatra eny amin'ny oniversite rehetra fa mbola hifampidinika amin'ny alalan'ny COPRIES ireo filohany sy mpitantana ny IST (Institut Supérieur de Technologie) ary ny eo anivon’ny minisitera,

raha ny fanazavana efa nataon’ny minisitra Rasoazananera Marie Monique. Tsy mbola misy tokotaniny, araka izany, ny tontolon’ny fampianarana ambony taorian’ny fitsaharan’ny fampianarana vokatry ny pesta. Ny taom-pianarana tsy mbola tapitra ho an’ny ratsam-piofanana maro, ny fanadinana hidirana taona voalohany ihany koa nihemotra sy tsy mbola misy tokotaniny. Tsy mbola misy kosa anefa ny fanapahan-kevitra noraisina fa tsikaritra ho misy ny finiavana hampitarazoka azy hatrany. Resaka fandaminana anatin’ny oniversite tokoa ve sa mety misy ambadika hafa, toy ny hoe tsy mbola misy ny vola natokana ho amin’ny fandoavana vatsim-pianarana, izay matetika miteraka grevy ? Mitandro mafy ny tsy hisian’ny fitokonana ny fanjakana. Anisan’ny paikady efa nataony hanalefahana ny hetsi-pitakiana eny amin’ny anjerimanontolo ny fanomezana toerana sy seza ireo mpitarika na koa fandefasana azy ireny hanao hetsika any amin’ny faritany. Mikorontana sy mitotongana ny tontolon’ny anjerimanontolom-panjakana, ka andrasana izay mety ho vahaolana maharitra sy mety ho fanapahan-kevitra hentitra horaisina mandritra ny COPRIES. Asa na horesahina koa ny momba ny fampiakarana Filankevi-pifehezana (CODIS) ireo mpianatra miisa 71, izay voasaringotra tamin’ny raharahara fanakorontanana sy doro trano ny 12 oktobra. Toa nidiran-dRivo Rakotovao an-tsehatra anefa ny fampanginana ny raharaha. Mbola manana ny fiandrianany ve ny anjerimanontolom-panjakana eto amintsika ?

Toky R

Tia Tanindrazana

Samia mijoro ho an'i Gasikara.