Fampianarana

Nenjehina ho nanaparitaka laza adina hosoka Afaka ilay mpampianatra sy mpianany telo

Fampianarana
Talata 03 Novambra 2020

Namoaka didy ny fitsarana Ambaratonga voalohany tao Antalaha omaly 02 novambra mahakasika ny fitoriana momba ny fiparitahan'ny laza adina

Bakalorea sandoka ka nampidirana am-ponja vonjimaika ny mpampianatra sy ny mpianany telo, talohan’ny fanadinana "Baccalauréat 2020". Natsahatry Fitsarana manomboka ny fanenjehana ireo voarohirohy, ka afaka madiodio ny mpampianatra miaraka amin'ny mpianany telo. Naharitra adin’ny roa ny fihainoana ireto voampanga ireto ary nipoitra teo ny marina rehetra satria nisy vavolombelona miisa dimy sahy nanapotsitra ny fototra nahatonga an'ireo notazonina vonjy maika tany am-ponja. Nihazo ny CEG ny mpampianatra ary ny mpianatra miaraka amin'ny Ray aman-dreny taorian’ny didy. Hikiaka, horakora-pifaliana, tsy vitsy ny latsaka ranomasom-pifaliana, izay no sombin’ny zava-nisy teo am-pandrenesana sy taorian’ny nahafantarana ny didin’ny Fitsarana. Tsy nitsitsy nanapoitra ny marina rehetra momba ity tranga ity rahateo ilay mpisolovavan’ireto mpianatra ireto, Me Barison Jaotsara, hoy ny vaovao navoakan’ny Radio Mangarahara. Atao ahoana kosa ireo ankizy very zo tsy nanatrika fanadinana kanefa tsy meloka raha ny didim-pitsarana? Hanomanana « Session spéciale» ve?

Toky R