Fampianarana

Mpianatry ny INSCAE Manasoa hatrany ny mpiara-belona

Fampianarana
Alakamisy 16 Novambra 2017

Fanaon’ny mpianatra ao amin’ny INSCAE (Institut National des Sciences Comptables et de l’Administration d’Entreprises) no manao asa sosialy ary ny mpianatra mihitsy no manatanteraka izany ho fanasoavana ny vahoaka sy ny mpiray tanindrazana, indrindra ireo ao anatin’ny fahasahiranana.

Notanterahin’ny fikambanana mpianatra "Nify Salama" ny sabotsy 11 novambra 2017 ny anjara adidiny nanolorany fanampiana ho an’ny sekoly tsy miankina Mitsimbina ao ao amin’ny kaominina Soalandy Ankadivoribe. Nisy ihany koa ny fandokoana ny sekoly, fanolorana fitaovam-pialamboly ary fitaovam-pianarana ho an’ireo mpianatra. Teo andanin’izay, nisy ny fotoana natokany nampianarana ny kilasy manomana ny CEPE sy nizaràny ny soa sy anatra rehetra mba hizoran’ireo ankizy amin’ny lalana tokony halehany. "Ny fianarana no lova tsara indrindra, ary harena sarobidy sady mavesa-danja". Izany no hafatra napetrak’ireo mpianatry ny INSCAE dia Rajaonah Daniel, Randriamorasoa Jemima, Rajaonarivony Fy, Randriamialison Rovatiana, Rakotonanahary Fenitra, Andriamampiadana Princy sy i Andriatsitohaina Luciano tamin’ireo zandriny ireo. Teo am-pamaranana dia nilaza ihany koa izy ireo fa "Tsara raha isika Malagasy no mifanasoa sy mifanampy, fa izany no tena fampandrosoana". Tsara halain-tahaka ny tahaka izao.

Toky R