Mari-pahaizana

nomerika ekena iraisam-pirenena

Fampianarana
Alarobia 09 Septambra 2026

Hiara-hiasa amin’ny METFP ny GIP Pix Frantsay

Nihaona tamin’i Benjamin Marteau, Tale Jeneralin’ny GIP Pix, ny delegasionan’ny METFP notarihin’ny Minisitry ny Fampianarana Teknika sy ny Fanofanana Arak’asa, Dr Andriamampandry Todisoa Manampy, ny 7 septambra 2026 tao Paris, Frantsa. Rafitra any Frantsa miandraikitra ny fanombanana, fampivoarana ary fanamarinana ny fahaiza-manao nomerika, amin’ny alalan’ny sehatra an-tserasera “Pix”, izay ekena sy ampiasaina amin’ny sehatra iraisam-pirenena ny GIP Pix. Nifantoka tamin’ny fahazoana mari-pahaizana nomerika ekena eo amin’ny sehatra iraisam-pirenena ny dinika, ka nampifanarahana amin’ny fenitra CRCN (Cadre de Référence des Compétences Numériques) sy DIGCOMP (Digital Competence Framework), ary nanamafy ny fiaraha-miasa eo amin’ireo sampan-draharaham-panjakana. Tafiditra ao anatin’ny dingana vaovao ho fanamafisana ny fahaiza-manao nomerika ananan’ny tanora malagasy izany, manokatra làlana ho amin’ny fanovàna stratejika eo amin’ny ETFP sy ny fanomanana ny tanora amin’ny fahaiza-manao takian’ny ho avy. Ahitana fahaiza-manao miisa 16 voazara ho sehatra lehibe dimy ny mari-pahaizana: fampahalalana sy angon-drakitra, fifandraisana sy fiaraha-miasa, famoronana votoaty, fiarovana sy fandriampahalemana, ary tontolo iainana nomerika. Ity fihaonana ity no dingana voalohany mankany amin’ny fiaraha-miasa stratejika, hanohanana ny fanovàna nomerika eo amin’ny rafitra ETFP sy hanome lanja iraisam-pirenena ny fahaiza-manao nomerika ho an’ny tanora eto Madagasikara, araka ny tatitra ofisialy.
Toky R