Fampianarana

Manampahaizana navoakan’ny IT University Maro no efa nahita asa sahady

Fampianarana
Alakamisy 13 Desambra 2018

Nitombo 98 mianadahy indray ireo tanora manampahaizana momba ny fikirakirana ny informatika avo lenta eto amintsika. Mpianatra navoakan’ny sekoly ambony IT University eny Andoharanofotsy izy ireo, ka ny 31 isa misalotra ny anarana Lafatra no notolorana ny mari-pahaizana “Master II” izany hoe

: nandalina ny informatika nandritra ny dimy taona taorian’ny nahazoany ny mari-pahaizana Bakalôrea raha notolorana ny mari-pahaizana “licence” kosa ireo andiany Iray izay tovovavy ny ankamaroany. Raha araka ny fanadihadiana natao omaly teny amin’ny ivontoeram-pilanonana Andy By pass namoahana azy ireo dia efa maro amin’izy 98 mianadahy ireto no nahita asa. Anisan’ny nandray azy ireo ny orinasa BASAN an’Atoa Karim Barday izay mpiahy azy ireo sady nianaran’ny mpianatra asa ihany koa na stage…. Misy ihany koa anefa ireo mbola hanohy ny fianarany hahafahany mandeha lavidavitra kokoa, indrindra fa ho an’ireo notolorana ny mari-pahaizana licence. Tsiahivina moa fa anisan’ny nanofanana azy ireo manokana ny resaka “Bases de données réseau”, na ny “Web integration et design” raha toraka izay ihany koa ny “Developpement d’application”. Mora ahitana asa na hananganana orinasa ho an’ny tena ny fahaizana mikirakira ny informatika avo lenta tahaka izao, antony manosika ireo tanora marobe ankehitriny hirona amin’izany. Ho an’ny IT University manokana dia mbola vonona hatrany izy ireo ny hanampy ireo tanora Malagasy liana.