Manam-pahaizana momba ny fadin-tseranana

Partagé sur :
• facebook

Tontosa omaly teny amin’ny Espace Rose By Pass ny famoahana ny andiany “Masova”

ho an’ny lalam-piofanana «Transit et Douanes» na ny tontolon’ny fadin-tseranana teo anivon’ny sekoly ambony INSPNMAD. Manam-pahaizana miisa 94 mianadahy no navoaka nandritra izany, izay nahazo ny mari-pahaizana DTS sy Licence. 56 amin’izy ireo nahavita ny fianarana mahakasika ny «Transit» ary ny 38 kosa nanaraka ny fiofanana “Commerce International” na tsena iraisampirenena. Nambaran’ny Talen’ny fampianarana, Randrianasolo Jean De Dieu, fa hiadian’ny orinasa ny mpianatra mivoaka avy eo anivon’ny INSPNMAD, rehefa any amin’ny sehatry ny asa noho izy ireo manana ny maha izy azy. Azo antoka araka izany ny hoavin’ireo tanora mahavita fianarana amin’ity lalam-piofanana «Transit et Douanes» ity ary misy mihitsy no manangana orinasa ho azy manokana, hoy ny fanazavàna. Tsiahivina fa efa nanomboka ny taona 2000 no nisy ity lalam-piofanana ity teo anivon’ny INSPNMAD ary mpianatra maro no efa navoakany. Efa miitatra manerana ny nosy ihany izany lalam-piofanana izany, izay efa misy any Toamasina, Fianarantsoa ary Antsirabe. Aorian’izao fahavitan’ny fianarana izao, hizara roa ireo mpianatra, ka misy ny tonga dia hiasa avy hatrany ary misy kosa ireo izay mbola hanohy fianarana Master 1 sy Master 2, araka ny fanazavana hatrany. Nanamafy ny filoha tale jeneralin’ny sekoly fa mbola malalaka ny asa ho an’ity lalam-piofanana ity eto Madagasikara ary anisan’ny sekoly matihanina ny INSPNMAD amin’ny fampitàna fahalalana ho an’ny mpianatra ary manana mpampianatra manana traikefa ihany koa.
J. Mirija
 

Tia Tanindrazana

Samia mijoro ho an'i Gasikara.