Fampianarana

Laza adina bakalorea Tsy misy atahorana fa voaaro tsara

Fampianarana
Zoma 24 Aogositra 2018

Telo andro anio zoma no natoka-monina ireo mpampianatra nandrafitra ny laza adina Bakalôrea ankapobeny sy teknika izay hotontosaina eto amintsika manomboka ny 17 septambra ho avy izao.

Haharitra 40 andro ny fitokanana, fotoana izay tsy hahafahan’ireo mpampianatra ireo mifanerasera na amin’iza na amin’iza raha tsy vita ny asa nampanaovina azy. Tsy misy atahorana ny mety hivoahan’ny laza adina mialoha, hoy ny minisitry ny fampianarana ambaratonga ambony, Rasoazananera Monique. Tsy miova ihany koa ny daty hanatanterahana ny fanadinana fa mbola voatazona ihany ny teo aloha. Ny 17-21 septambra no hanatanterahana ny Bakalôrea ankapobeny sy ny tapany voalohany amin’ny Bakalorea teknika. Hitohy ny 24-27 septambra kosa, ho an’ny tapany faharoa ho an’ity farany. Ny 27 aogositra ka hatramin’ny 7 septambra ho avy izao kosa no hanaovana ny adina ara-panatanjahantena ho an’ireo mpiadina eto an-drenivohitra. Raha ny fantatra, mahatratra 184.708 ireo mpiadina hiatrika izany manerana ny Nosy izay nitombo 0,98 % raha oharina tamin’ny taon-dasa.

Pati