Fampianarana

Kolejy La Lumière Talatamaty Nitokona teny Analakely ny ray aman-drenin’ny mpianatra

Fampianarana
Alarobia 04 Oktobra 2017

Nanatontosa fitokonana manoloana ny biraon’ny ofisim-pirenena misahana ny sekoly tsy miankina etsy Analakely ( ONEP) omaly,

ireo ray aman-drenin’ny mpianatra nanovo fahalalana teo anivon’ny Collège La Lumière teo aloha, eny Talatamaty. Raha araka ny fitarainan’ireo ray aman-drenin’ny mpianatra mantsy dia tsy mbola navoakan’ny ONEP ihany ny taratasy fahazoan-dalana hahafahan’ny sekoly « International Academy Madagascar » hampianatra, sekoly izay nisolo ny College La Lumière efa nakaton’ny fanjakana. Tsy misy hidiran’ireo teratany Tiorka intsony ity sekoly vaovao ity, hoy hatrany izy ireo, satria efa teratany Frantsay ankehitriny no mitantana azy, amin’ny alalan’ny Horizon éducation France izay nividy azy. Nanambara ireo ray aman-drenin’ny mpianatra fa tsy misy afaka hianatra ireo menaky ny ainy, raha tsy azo avy amin’ny ONEP io taratasy fahazoan-dalana io. Nomarihin’izy ireo ihany koa fa efa nisy ny resaka nifanaovana tamin’ny minisitry ny fanabeazam-pirenena, saingy ny ONEP sisa no hany vato misakana. Efa tokony ho tamin’ny 18 septambra teo no niditra nianatra ireo mpianatra miisa 280 manovo fahalalana eo anivon’ity sekoly « International Academy Madagascar » ity, saingy mbola izao miandry ny taratasy fahazoan-dalana izao. Nisy moa ny fandraisan’ny talen’ny ONEP azy ireo omaly koa andrasana izay mety mbola ho tohin’ny raharaha.

Pati