Fampianarana

Karaman’ny mpampianatra FRAM Ny Ministeran’ny Fanabeazam-pirenena no handoa azy

Fampianarana
Alatsinainy 05 Oktobra 2020

Tsy misy mandoa sara-pisoratana anarana intsony ireo mpianatra manovo fahalalana eny anivon’ireo sekolim-panjakana rehetra manerana ny Nosy manomboka amin’ity taom-pianarana vaovao ity.

Betsaka ireo velom-panahiana noho izany mikasika ireo mpampianatra FRAM izay mbola karamain’ny Ray aman-dRenin’ny mpianatra amin’ny alalan’ireny vola alohany ireny avokoa ny ankamaroany ka sao hiteraka olana. Nambaran’Atoa Aina Nambinintsoa Ratsimandresy, lehiben’ny fari-piadidiam-pampianarana any Ankazobe fa efa misy ny paikady novolavolain’ny ministera hijerena manokana ireny mpampianatra FRAM ireny. Ity ministera ity no handray an-tanana ny momba azy ireny mba hanamaivanana ny fahasahiranan’ny Ray aman-dReny. Tsiahivina moa fa tsara ny voka-panadinana BECP ho an’ity fari-piadidiam-pampianarana iray ity. Tafakatra 58,28 % izany raha 51,13 % tamin’ny taon-dasa. Ny taranja kajy raha araka ny fanazavan’ity lehiben’ny fari-piadidiam-pampianarana any Ankazobe ity no nahalatsaka kely ny naotin’ny mpiadina saingy na izany aza saika avotr’izy ireo tany amin’ny taranja literera avokoa izany rehetra izany.

Pati