Fampianarana

Injeniera informatika malagasy Hararaotin’ny vahiny

Fampianarana
Sabotsy 28 Jolay 2018

Miisa 15.000 eo ho eo ireo asa mivantana foronin’ny sehatry ny teknolojia eto amintsika raha 60.000 no tsy mivantana, araka ny tarehimarika nampahafantarin’ny rafitra Goticom, izay isan’ny miompana amin’izany eto amintsika, tetsy amin’ny CCIA Antaninarenina omaly.

Ny olana mitranga amin’izao fotoana, hoy izy ireo, dia fantatr’ireo vahiny fa manankarena injeniera mahay sy mora miasa ny Malagasy ary saika isan-taona dia misy amin’izy ireny no alain-dry zareo hiasa any ivelany ary tsy averiny intsony. Anisan’ny andrahonan’ireo vahiny antsika, ohatra, ny hoe tsy omena Visa ny malagasy. Hararaotin-dry zareo karamaina amina karama antsasaky ny tokony ho anjarany koa ireo malagasy rehefa tonga any ka raha mandray 5000 euro, ohatra, ny vahiny dia ny an’ny malagasy 2500 euro kanefa ny hofan-trano 1000 euro. Mbola miampy ny vidin-tsakafo sy ny hafa ny fahasahiranana, hoy ry zareo. Vokatr’io fangalaram-pahaizana na « fuite de cerveau » io dia an-tapitrisa dolara no vola tokony hiditra amin’ny fanjakana lasa very eto amintsika. Tsy ekena intsony izany, hoy ny Goticom, ka hanao fanentanana sy hiara-kiasa amin’ny fanjakana sy sehatra tsy miankina izahay hitady izay fomba hampitsaharana azy io.

J. Mirija/ Tsiry