Fampianarana

Imerimanjaka Antanetibe Mahazaza Mahitsy Nahazo EPP vaovao manara-penitra

Fampianarana
Talata 06 Novambra 2018

Mbola betsaka amin’ireo ankizy ao amin’ny fokontany Imerimanjaka, kaominina Antanetibe Mahazaza Mahitsy no tsy afaka mandia ny varavaran-tsekoly amin’izao.

Noho ny tsy fahampian’ny fotodrafitrasa handraisana azy ireo no antony mahatonga izany, indrindra fa ny sekoly ambaratonga fototra. Mba ho fanampiana azy ireo ary dia notoloran’ny “Association les Lémuriens de Madagascar” sy orinasam-pifandraisana Telma EPP vaovao mahatanty rivodoza izy ireo. Ny herinandro teo no notokanana tamim-pomba ofisialy ny fotodrafitrasa, ahitana efitrano miisa roa, mahazaka mpianatra 40 isanisany. Tonga nanatrika ny lanonana ny Ben’ny tanànan’ny kaominina Antanetibe Mahazaza ny dokotera Feno, notarihin’ny filohan’ny fikambanana Randrianarison Henry Tsoka. Ny mba hahafahana miady amin’ny fahantrana eto amintsika sy tsy habadoana no tena tanjon’ny fikambanana amin’izany, indrindra fa any amin’ireo kaominina ambanivohitra toa an’Antanetibe Mahazaza. Tsiahivina fa any Nantes France no misy ny foiben’ny fikambanana. Any Antanetibe Mahazaza kosa no misy izany raha eto Madagasikara no resahina, tarihin-dRakotoarimanana Estelle, filoha nasionaliny.

Pati