Fampianarana

Fokontany Antanambao Ivato Hahazo EPP vaovao

Fampianarana
Alarobia 22 Novambra 2017

Mitohy hatrany ny fananganana fotodrafitrasa ao anatin’ny kaominina Ivato amin’izao, tarihin’ny Ben’ny tanàna Penjy Randrianarisoa. Notanterahina omaly indray ny hady fototry ny EPP vaovao ao amin’ny fokontany Antanambao.

Nitarika ny lanonana tany an-toerana ny Ben’ny tanàna sy ireo mpiara-miasa akaiky aminy, asa ezahina hovitaina ato anatin’ny telo volana. Misy efitra enina ity EPP vaovao ity, mahazaka mpianatra hatramin’ny 240 ka ny antsasany mianatra maraina, ny ambiny mianatra hariva. 40 tapitrisa Ar no vola natokana hananganana ny fotodrafitrasa, famatsiam-bola madiodio avy amin’ny kaominina vokatry ny hetra naloan’ny isan-tokantrano. Tsy maintsy averina amin’ny vahoaka ny tombontsoa azo avy amin’ireny, hoy ny Ben’ny tanàna Penjy Randrianarisoa nandritra ny fandraisam-pitenenana nataony, raha mbola hiandrasany ny malala-tanana kosa ny fanolorana ireo karazam-pitaovana toy ny dabilio sy ny seza hampiasain’ny mpianatra. Tsiahivina fa any amin’ny EPP Ivato tanàna na Mandrosoa no manenjika mianatra ireo ankizy madinika ao amin’ity fokontany iray ity izay marihina fa zanaky ny sahirana ara-pivelomana ny ankamaroany. Faly ireo ray aman-drenin’ny mpianatra ao an-toerana.

Pati