Fampianarana

Fiverenan’ny fampianarana Mailo hatrany ny LTC Ampefiloha

Fampianarana
Talata 07 Novambra 2017

Niverina nianatra nanomboka omaly 06 novambra ny sekoly rehetra, izay voatery nahatsahatra ny fampianarana noho ny fisian’ny valan’aretina pesta.

Fanombohana ny taom-pianarana 2017-2018 mihizy ity ho an’ireo sekoly rehetra nanaraka ny toromariky ny Minisiteran’ny Fanabeazam-pirenena. Ho an’ny sekoly LTC Ampefiloha, izay tantanin’Atoa Ranaivo José Emmanuel, dia ny fakana ny fanadaharam-potoana amin’ny fampianarana na ny « emploi du temps » no nisantarana izany. Efa nisy ny fandrarahana DDT ho an’ny kilasy rehetra raha vao nanomboka niandoha ny valan’aretina pesta. Amin’izao fidirana izao kosa dia efa mitsangana ny « comité de vigilance » mba ho fiatrehana momba ny tranga mety tsy hampoizina, ary efa vonona ihany koa ny « salle d’isolement » miisa 2 handraisana an-tànana ireo mpianatra ahiahiana ho tratry ny valan’aretina na toe-javatra hafa mifandraika amin’izany. Fepetra noraisina ny fanajana hatrany ny fahadiovana ka tsy maintsy manasa tànana ny mpianatra mialohan’ny hidirana any an-dakilasy. Misy ihany koa ny fanentanana amin’ny tsy handehanana any an-tsekoly raha vao misy tranga mampiahiahy ho an’ireo mpianatra, ary eo ankilan’izany, dia mitohy ny fanaraha-maso ataon’ny minisiteran’ny fanabeazam-pirenena. Tonga dia vavany ny fampianarana ho an’ny LTC Ampefiloha anio 7 novambra, ka hianatra avokoa ny mpianatra ao amin’ny taona voalohany sy faharoa ary fahatelo. Marihina fa misy ny mari-pahaizana BTS (Brévet de Téchnicien Superieur), BACC + 2 aorian’ny Bakalorea ho an’ireo mpianatra manovo fahalalana ao amin’ny LTC Ampefiloha.

Toky R