Fampianarana

Fiverenana an-tsekoly Mila hentitra ny “Comité de vigilance”

Fampianarana
Sabotsy 04 Novambra 2017

Namoaka fanambarana omaly ny minisiteran’ny fanabeazam-pirenena fa efa feno ny fepetra rehetra hahafahan’ny mpianatra miverina an-tsekoly,

ho an’ireo fari-piadidiam-pampianarana sy ZAP nahitana ny valanaretina pesta teto amintsika. Tsy miova fa amin’ny alatsinainy 6 novambra ho avy izao izy ireo no handia ny varavaran-tsekoly indray taorian’ny fiofanana nomena ireo lehiben’ny fari-piadidiam-pampianarana, ny sefo ZAP, ny talen-tsekoly ary ireo tompon’andraikitra maro samihafa. Nambaran’Andriamatoa Tsitohara Serge Pierrot, talen’ny serasera sy ny fampitam-baovao eo anivon’ny minisiteran’ny fanabeazam-pirenena fa nisy ireo lamina efa napetraka tsy maintsy arahina hitandroana ny fahasalaman’ny ankizy mpianatra. Anisan’ireny ny fisian’ilay efitrano mitokana handraisana an’ireo ankizy ahiana amin’ny aretina pesta, ny fananganana ilay “comité de vigilance” izay handray an-tanana manokana ny fitsapana ny hafanan’ireo mpianatra eo am-pidirana sy hikarakarana azy ireny amin’ny fanosorana ilay ranom-panafody madity famonoana mikraoba…Nisy moa omaly ny fanoloran’ny orinasa Startimes ranom-panafody famonoana bibikely 1.000 litatra sy fitaovana ahafahana manadio faritra mirefy 1.000 metatra hifaneraseran’olona manodidina ny 167 isa ka efitrano fianarana miisa 167 no hahazo tombontsoa amin’izany.

Pati