Fampianarana

Fitokonan`ny mpampianatra Tsy miato raha tsy mivaly ny fangatahana

Fampianarana
Sabotsy 09 Jona 2018

Mitohy hatrany fitokonana ataon`ny mpampianatra amin`ny DREN manerana ny Nosy. Nilaza izy ireo fa tsy hitsahatra izany raha tsy mivaly ny fangatahana.

Efa nandefa taratasy mirakitra fitakiana eny amin`ny praiminisitra vaovao ireo mpampianatra ary nisy ihany koa ireo taratasy tany amin`ny depiote ho an`ny Fanovana. Araka ny fanazavan-dRakotondramanana Tiana Josoa, sekretera jeneralin`ny Syndicat autonome de Madagascar, dia tsy mijanona ny tolona raha tsy mivaly ny fitakian’izy ireo. Nohamafisiny fa olona ao amin`ny sehatry ny fanabeazana no mahavaly ny fitakiana natao fa tsy olona avy any ivelany. Raha mba olona manana traikefa no tonga ho minisitra dia hivaha ny olana. Na dia nanana finiavana aza ny minisitra Paul Rabary dia sarosarotra ny fifampiresahana teo aminy sy ny teknisianina. Nahatsapa kosa ny minisitra fa nisy zavatra tokony ho nohafainganina tao saingy tsy tanteraka noho ny tsy fifampiresahana. Araka izany, tsy misokatra ny fampianarana raha tsy tonga ny minisitra vaovao, vita ny fifanarahana, valiana ny tombontsoan`ny mpampianatra. Samy miandry ny fijoroan`ny governemanta Ntsay ny rehetra.

Marigny A.