Fampianarana

Fitarainan’ny mpampianatra Olana 23 no hitadiavam-bahaolana maika

Fampianarana
Zoma 09 Oktobra 2020

Mbola betsaka ireo olana sedrain’ireo mpampianatra eto amintsika na dia anisan’ny miantoka ny ho avin’ny taranaka Malagasy aza izy ireny. Ankoatra ny resaka “ grille indiciaire”

ho an’ireo mpampiasa efa mpiasam-panjakana dia mbola manana olana ireo mpampianatra FRAM amin’ny resaka karama raisin’izy ireo isam-bolana, ny fampitaovana…. Tsy nanao ambanin-javatra izany ny “Coalition Nationale Malgache pour l’éducation pour tous” na ny CONAMEPT omaly notarihin’ny mpandrindra nasionaliny Rtoa Huguette Rakotoarivony. Nisy ny hetsika notanterahiny nentina nankazana ny andro maneran-tany ho an’ny mpanabe omaly tetsy amin’ny carlton Anosy. Sendika sy fikambanana ary vovonana hivondronan’ireo mpampianatra maro no nasainy tamin’izany izay nandefa solontena 5 isanisany. Nivoitra nandritra izany fa hisy ny fandrafetana kahiem-pitarainana iray vaovao hasolo ilay narafitra tamin’ny taona 2016. Raha araka ny fantatra mantsy dia misy amin’ireo fitarainana voarafitra tao anatin’ity kahiem-pitarainana farany ity no efa lasa daty nefa misy ihany koa ireo zava-baovao takian’ny fivoaran’ny toetr’andro tokony hampidirina ao anatiny. Natsangana ny komity hijery akaiky izany hahafahana manatsara ny fari-piainan’ireo mpampianatra mpanabe izany mba hanomezany kalitao tsara ny fanabeazana ireo zaza Malagasy. Tsiahivina moa fa hatolotra ny mpamatsy vola, ny primatiora, ny ministera isan-tsokajiny ity kahiem-pitarainana ity. Fitarainana vaovao miisa 7 indray moa no voaangon’ny CONAMEPT tany amin’ny Faritra Sofia raha mbola misy 16 isa ireo vao hitadiavam-bahaolana. Ny 4 tamin’ireo 20 isa teo aloha mantsy no efa nivaha.

Pati