Fampianarana

Filohan’ny oniversiten’Antananarivo Vonona hiady sy hanafoana ny kolikoly

Fampianarana
Zoma 24 Mey 2019

Tafapetraka tamim-pomba ofisialy omaly alakamisy 24 mey teny Ankatso ny filohan’ny oniversiten’Antananarivo vaovao ny profesora Mamy Ravelomanana taorian’ny fifidianana natao.

Tonga nanome voninahitra ny lanonana ny minisitry ny fampianarana ambaratonga ambony Rtoa Rejo Felicité Fienena. Nambarany fa hiova tanteraka ny fomba fiasa manomboka izao. Anisan’ireny ny fanatsarana ny kalitaon’ny fampianarana, ny fampitaovana ary ny ady amin’ny kolikoly. Hapetraka ihany koa ny toerana hahafahan’ny mpampianatra sy mpianatra ary ireo tompon’andraikitra isan-tsokajiny mifanakalo hevitra hisorohana ny olana mety hitranga. Hisy koa ny campus vaovao hatsangana toy ny any Fenoarivo Atsinanana, Vakinankaratra … Tsy ho latsa-danja amin’ireo ny ady amin’ny kolikoly toy ny fitantanana ny vatsim-pianarana, ny famoahana ny diplaoma ary ny fandraisana mpampianatra sy mpianatra. Fanambin’ity filohan’ny oniversite vaovao ity rahateo moa ny hoe : Ny marina, ny mangarahara ary ny mampiavaka.

Pati sy Tsirinasolo