Fifaninanana « Robotex intenational 2024 »

Partagé sur :
• facebook

Harena 11 taona, Fitizo 13 taona, ary Sodana 11 taona ! Izy ireo indray no hisolotena an’i Madagasikara

amin’ny fifaninanana « Robotex intenational 2024 », fifaninanana mikasika ny robotika hatao any Tallinn Estonie ny 6-7 desambra 2024 izao, araka ny fampahafantarana nataon’ny STEM4Good Madagascar tamin’ny pejin-tseraserany. Mpikambana ao amin’ny STEM Club, programam-pampianarana na ivelan’ny fianarana izay mamondrona ireo ankizy sy tanora lahy sy vavy 7-17 taona liana amin’ny tontolon’ny « codage », ny robotika ary ny STEM (Science, Technology, Engineering and Mathematics) izy ireo. Misitraka tan-tsoroka avy amin’ireo matihanina na mitari-dàlana na « mentors ». Amin’ity indray mitoraka ity, dia ny fanamboarana « Robot » miady amin'ny hai-trano, doro tanety, doro ala no lohahevitra, izay hifaninanan’izy ireo miaraka amin'ny mentors. Ny robot dia hanao iraka hijery ny misy labozia mirehitra napetraka ao amin’ny faritra hifaninanana ary hamono izany ao anatin’ny fotoana voafetra, raha ny fanazavana. Naneho ny STEM4Good Madagasikara, fa ny ady amin’ny haintrano dia fifaninana miantefa amin’ny ankizivavy sy ny renim-pianankaviana ihany koa, ary handrisiahana ny tanora misehatra amin’ny tontolon’ny teknolojia mba hampivelatra ireo fahaiza-manao ilaina mba hahazoana vokatra amin’io sehatra io. Tsara ny mampahatsiahy, fa vao ny faran’ny septambra teo no norombahin’ny Malagasy ny « First Global Challenge 2024 » fifaninanana momba ny robotika ihany koa, ka irariana mba hahazo vokatra tsara ihany koa ireto telo mirahavavy mbola ankizy dia ankizy saingy efa hiaka-tsehatra sahady amin’ny fifaninanana iraisam-pirenena avo lenta ireto.
Toky R

Tia Tanindrazana

Samia mijoro ho an'i Gasikara.