Fampianarana

Fifaninanana mamorona Robot Tsy lasa any Arménie ny solontenan’i Madagasikara

Fampianarana
Alatsinainy 11 Novambra 2019

Tamin’ny faran’ny herinandro teo no tokony ho niainga nankany Arménie ny ekipa malagasy Girls Robotika Madagascar izay saika hiatrika ny fifaninanana iraisam-pirenena mamorona Robot ( Robotex Armenia 2019).

Tsy lasa anefa izy 5 vavy solontena Malagasy noho ny tsy fahampian'ny enti-manana. Na dia efa naroso hanampiana ny vola voangona aza ny teto am-pelatanana rehetra dia mbola lavitra ny ezaka, hoy izy ireo. Na izany aza dia tsy hijanona eo ny tantaran'izy 5 vavy ary tsy ho very maina ny ezaka lehibe natao izay niaretan-tory sy ny fitotototoana hitady mpanohana nandritra ny 2 volana. Hataonay hoy izy ireo izay hahatafiditra anay amin'ny fifaninanana manaraka. Nisaotra eram-po an’izay nanohana rehetra ho fampahafantarana ny ezaka hanatsarana ny fampianarana siantifika eto Madagasikara izy ireo. Nankasitraka ireo nahafoy vola rehetra izy ireo ary nomarihany manokana ny fisaorana ny fiadidiana ny Repoblikan’i Madagasikara sy ny minisitry ny tanora sy ny fanatanjahantena ary ny minisitry ny paositra izay nihaino azy ireo sady nampanantena mihitsy kanefa indrisy.

Tsirinasolo