Fampianarana

Partagé sur :
• facebook

Nafana ny toe-draharaha teny Ankatso sy Ambohipo omaly. Vao maraina dia efa tonga maro be ireo mpianatra, tazana teny ihany koa ny mpitandro filaminana avy ao amin’ny Emmoreg.

Nanao fitokonana teo amin’ny sampanana manoloana ny Cité fonenan’ireo mpianatra eny Ankatso I omaly nanomboka tamin’ny 9 ora maraina ireo mpianatra monina eny an-toerana. Manoloana ireo olana misy mianjady amin’ny oniversiten’Antananarivo, toy ny tsy fahalavorarian’ny rafitra LMD sy ny fikasan’ny minisiteran’ny fampianarana ambony hanala ireo mpianatra monina eny amin’ireo fonenana natokana ho an’ireto mpianatra ireto ary ny tsy fizoran’ny fampianarana sy fikarohana eny amin’ny anjerimanontolo araka ny tokony ho izy no antony. Efa fantatry ny minisitra efa ela, hoy ny solontenan’ireo mpianatra ny olanay ary miandry azy hamaha izany izahay. Efa nisy ny fihaonana fa ny hangatahanay dia ny fanatanterahana atrikasa ho fakan-kevitra amin’ny rehetra ahitam-bahaolana maharitra. Etsy an-kilany dia manazava ny avy eo anivon'ny minisiteran'ny fampianarana ambony sy fikarohana ara-tsiansa fa fanadiovana ireo “cités universitaires” no tian'ny ministera hatao. Hanjakan'ny gaboraraka tanteraka nandritra ny taona ny eny ka maro amin'ireo izay mipetraka eny no efa tsy mpianatra intsony fa misy mihitsy aza efa manambady aman-janaka, hoy ny fanazavana. Nafampana indray ny hetsika teny Ankatso omaly, nisy ny tora-bato ary toy ny mahazatra moa dia nirefodrefotra ny lakrimozenina ho fanaparitahana ireo mpanao fihetsiketsehana. Olona telo no fantatra fa voasambotra omaly satria nambara fa nitoraka ny mpitandro filaminana. Nanamafy ireo mpianatra fa mbola hitohy ny tolona ary hihamafy hatrany. Tazana niditra tao anatin’ny Cité ihany koa ireo mpitandro filaminana. Aiza ho aiza ny fipetraky ny antsoina hoe “franchise universitaire” izay mandrara ny mpitandro filaminana tsy hiditra anatin’ny faritra hiadidian’ny oniversite ?

J. Mirija

Tia Tanindrazana

Samia mijoro ho an'i Gasikara.