Fampianarana

Fiatrehana ny fidiran’ny mpianatra Voatery midi-trosa ny ankamaroan’ny ray aman-dreny

Fampianarana
Zoma 09 Novambra 2018

Mbola tafiditra tanteraka ao anatin’ny fiatrehana ny fidiran’ny mpianatra isika ankehitriny. Amin’ny herinandro ho avy io mantsy vao hiditra amim-pomba ofisialy avokoa ireo mpianatra eny anivon’ny sekolim-panjakana raha efa niditra tamin’ny volana septambra sy oktobra kosa ny ankamaroan’ireo sekoly tsy miankina.

Noho izay antony izay indrindra dia betsaka tamin’ireo ray aman-dreny no voatery nidi-trosa. Diso nifanakaiky loatra mantsy ny fotoam-pialantsasatra sy ny fotoana nidiran’ny mpianatra teny anivon’ny tsy miankina noho ny halavan’ny taom-pianarana 2017-2018. Ho an’ny sekoly tsy miankina La Prime etsy Anosibe dia anisan’ny niaina izany tokoa. Tsy afaka nandoa ny saram-pisoratan’anarana niaraka tamin’ny saram-pianarana volana oktobra avy hatrany mantsy ny ankamaroan’ireo ray aman-drenin’ny mpianatra ao aminy fa nandoa izany tsikelikely. Ny saram-pisoratan’anarana sy ny fitaovan’ny mpianatra aloha no tena novonjen’ireo ray aman-dreny vao nanefa tsikelikely ny saram-pianarana izy ireo. Tena nandefitra ny sekoly, hoy Razanamihaja Harivelo Clarisse, sady niezaka tsy nampiakatra ny vola fandoan’ny ray aman-dreny isan-taona ihany koa. Nomarihiny fa zanaky ny sahirana avokoa ny ankamaroan’ireo mpianatra ao aminy.

Pati