Fampianarana

Fiarovana ny ain’ny mpianatra Nanolotra fitaovana ny Airtel

Fampianarana
Zoma 17 Novambra 2017

Mitohy hatrany ny ezaka tanterahin’ny orinasam-pifandraisana Airtel entina hampiroboroboana ny sehatry ny fampianarana eto amintsika.

Taorian’ny nizaran’izy ireo Kits scolaires maimaimpoana dia nanolotra fitaovana hiarovana ny ain’ny mpianatra amin’ny fiampitana ny arabe toy ny takelaka misy soratra STOP sy fanamiana hanaovan’ireo tompon’andraikitra ho ana sekoly ambaratonga fototra miisa 50 eto an-drenivohitra izy ireo omaly. Tanjona ny hahafahana miaro ny ain’ireo mpianatra amin’ny lozam-pifamoivoizana, izay marihina fa tena mateti-pitranga tokoa tato ho ato. Tafiditra tao ny fanentanana sy fampianarana ny mpianatra sahady mba hahay hiaro tena rehefa miampita arabe. Tena zava-dehibe loatra izao fanolorana fitaovana izao, hoy ny tale jeneralin’ny Airtel Maixent Bekangba satria ilana fahamailoana tanteraka ny fiampitana ny arabe, eny fa na ho an’ny olon-dehibe aza. Sambany moa no nanolotra fitaovana iarovana ny ain’ny mpianatra amin’ny fiampitana ny arabe tahaka izao ity orinasam-pifandraisana iray ity. Samy niaiky izao ezaka goavana nataon’ny Airtel ho fiarovana ny ankizy mpianatra izao ireo talen-tsekoly miisa 50 sy ireo ray aman-drenin’ny mpianatra niantefan’izany.

Pati