Fampianarana

Partagé sur :
• facebook

Efa miomana sahady amin’ny fidiran’ny mpianatra taom-pianarana 2018-2019 ny ankamaroan’ireo ray aman-dreny ankehitriny.

 
 Hifarana amin’ity faran’ny volana aogositra ity ny fisoratana anarana ho an’ireo sekoly manana mpianatra  miditra volana oktobra . Efa tamin’ny volana jolay kosa ny an’ireo manana mpianatra miditra amin’ny volana septambra toy ireo manaraka ny fandaharam-pianarana frantsay.  140.000 Ar  ny vola tsy maintsy homanina ho an’ny mpianatra iray, miankina amin’ny kilasiny, fanavaozana  ny fisoratana anarana fotsiny raha mbola hafa ihany koa ny saram-pianarana izay nahitana fiakarany 10 % raha kely. Betsaka amin’ireo ray aman-dreny no tsy manana tetibola hanaovana vakansy fa tsy maintsy hiatrika sahady ny fidiran’ny mpianatra indray. Mikasika ny fitaovam-pianarana manokana dia tsara ny manamarika fa efa marobe ireo mpivarotra mivarotra izany ankehitriny. Ho ana mpivarotra iray etsy amin’ny pavillon Analakely, ohatra, dia nomarihiny fa efa mandeha ny tsena na dia tsy tena mahafa-po aza. Ireo kojakoja ilain’ny mpianatra madinika no tena be mpitady, toy ny pensilihazo miloko, ny kahie akanja, ny taratasy miloko isan-karazany… izay saika nahitana fiakarany hatrany amin’ny 10 % avokoa ny vidiny, raha oharina tamin’ny taon-dasa. Ny kahie no tena nahitana fiakarany, miankina amin’ny kalitaony. Nomarihin’ireo ray aman-dreny manan-janaka hampiditra mpianatra amin’ny volana septambra ho avy io fa mafy tamin’izy ireo ity taona 2018 ity satria sady nandoa saram-pianarana volana jolay izy ireo no nanavao ny fisoratana anarana amin’ity taom-pianarana vaovao ity ihany koa.

Pati

Tia Tanindrazana

Samia mijoro ho an'i Gasikara.