Fampianarana

Fandravana ny tolon’ny mpanabe Mampiasa volabe ny fanjakana, hoy ny mpitolona

Fampianarana
Talata 24 Jolay 2018

Fandravana ny tolon’ny mpanabe Mampiasa volabe ny fanjakana, hoy ny mpitolona

Tamin'ireo lisea ara-panjakana dimy lehibe eto Antananarivo, tsy nisy ny fampianarana omaly. Na teo aza ny fisian’ny fifanaovan-tsonia niarahana tamin’ny praiminisitra ny faran’ny herinandro teo ka nilazan’ny andiana mpampianatra avy amin’ireo elatra Antanimbarinandriana fa hiverina ny fampianarana nanomboka omaly, dia tsy tena nisy izany tamin’ny ankapobeny. Tsy nisy ny fianarana tao amin’ny LMA Ampefiloha, JJ Rabearivelo Analakely, Jules Ferry Faravohitra, Lisea Gallièni Andohalo. Nisy mpampianatra vitsy niasa kosa ny teny amin’ny Lisea Nanisana. Tao amin’ny onjam-peo iray, dia nilaza omaly Renadison Gabriel, iray amin’ireo mitarika ny tolon’ny mpanabe fa mampiasa volabe ny fanjakana ary mampiteny olom-bitsy. Olona voakarama ireny ka vao mainka hihamafy ny tolona manerana ny Nosy, hoy izy. Misy ny olona miseho azy mitarika tolona sendika teny Antanimbarinandriana satria matahotra ho very seza, raha ny nambarany. Hamitaka ireo olona ireo no nitsanganany teo, ary tezitra ny mpitolona teny, dia namonjy ny namany eny Anosy raha ny fanehoan-kevitr’ity mpitolona iray ity. Ny tambiny manokana momba ny resaka trano honenany na ny “Indemnité forfaitaire de residence” dia 90Ar, raha 100 000Ar any amin’ny hafa. Tsy mbola mivaha ny olana fa natao kosa izay hampifandramatra ny samy mpampianatra.

Toky R