Fampianarana

Fanadinana bakalorea Hotanterahina ny 17 ka hatramin’ny 21 septambra

Fampianarana
Sabotsy 20 Janoary 2018

Misy toy ny isan-taona ihany ary hifanaraka amin’ny datim-panadinana BEPC ny fotoana hanatanterahana ny fanadinana Bakalôrea manerana ny nosy amin’ity taom-pianarana 2017-2018 ity,

raha araka ny fanazavan’ny tale jeneralin’ny minisiteran’ny fampianarana ambaratonga ambony sy ny fikarohana siantifika ny dokotera Razafimahatratra Dieu Donné, omaly. Ny 17 ka hatramin’ny 21 septambra ho avy izao no hanatanterahana ny fanadinana Bakalôrea ankapobeny raha hifanaraka amin’izany ny fihodinana voalohany ho an’ireo mpiadina hiatrika ny fanadinana Bakalôrea teknika. Ny 24 ka hatramin’ny 27 septambra kosa ny fihodinana faharoa ho an’ny Baka teknika ihany, tetiandro samy navoaka tamim-pomba ofisialy omaly avokoa. Ny 29 janoary ho avy izao kosa ka hatramin’ny 27 aprily isaky ny ofisin’ny bakalorea isam-paritra ny fisoratana anarana. Mba hisorohana ny olana mety hitranga anefa dia tsy ekena ny fahatarana. 15.000 Ar kosa no saram-pisoratana anarana ho an’ny kandida atolotry ny sekoly ary 50.000 Ar ho an’ny kandida misora-tena. Tafakatra 100.000 Ar kosa izany ho an’ny kandida teratany vahiny izay manovo fahalalana eto Madagasikara. Nanamafy moa ity tale jeneralin’ny minisiteran’ny fampianarana ambaratonga ambony ity fa hitohy ny ezaka fanatsarana ny laza adina entina hanatsarana ny voka-panadinana.

Pati