Fampianarana

Fanabeazana mampiaty Ho arahi-maso akaiky amin’ity taona ity

Fampianarana
Sabotsy 10 Febroary 2018

Nifanolotra mari-pankasitrahana noho ny fiaraha-miasa nandritra ny taona 2017 tetsy amin’ny Le Pavé Antaninarenina, omaly, ny avy eo anivon’ny fiaraha-monim-pirenena, sehatra fanabeazana (CONAMEPT) sy ny ministeran’ny fanabeazana eto Madagasikara.

Maro ireo asa izay niaraha-nanao teo amin’ny roa tonta, isan’izany ny nahafahana nandray ireo tolo-kevitra ho amin’ny fanatsarana ny fanabeazana tafiditra ao anatin’ilay Teti-pivoarana ho an’ny fanabeazana na “Plan Sectoriel de l’Education” (PSE). Zava-dehibe tao anatin’ireo tolo-kevitra ireo ny fanomezan-danja manokana ny sehatry ny fanabeazana mampiaty, izany hoe, tsy manavaka na iza na iza, na tomady io na manan-kilema, araka ny fanazavan’ny mpandrindra nasionalin’ny CONAMEPT, Huguette Rakotoarivony, satria somary taraiky ity fomba fanabeazana ity, eto amintsika. Eo ihany koa ny ady amin’ny tsy fahaizana mamaky teny sy manoratra ary mikajy, ny fampivoarana ny fanabeazana, hitondra any amin’ny tsaratsara kokoa. Tanjona goavana ny fanaraha-maso ara-tekinika an’ity tetikasa ity, iarahana amin’ireo fiaraha-monim-pirenena toy ny “CONAMEPT”, hoy kosa ny avy eo anivon’ny minisitera, izay niara-namolavola azy. Manomboka amin’ity taona ity moa no hanatanterahana azy io ka hatramin’ny taona 2022, raha ny fanazavana hatrany.

J. Mirija