Fampianarana

Fampiasana ny “Puces RFID” sy ny “GPS tracker” Manana tetikasa goavana ny IT University

Fampianarana
Sabotsy 10 Febroary 2018

Oniversite tsy miankina tena mamiratra amin’ny fampianarana ny tontolon’ny Informatika eto Madagasikara ny IT university eny Andoharanofotsy, ary efa namoaka mpianatra maro be mamiratra hatrany ampitan-dranomasina amin’io sehatra io.

Tsy mionona amin’ny fampitana fahalalana fotsiny, fa manao fikarohana lalina amin’ny alalan’ny Laboratoara ITU-LABS. Eo am-panatontosana ny tetikasa goavana mifototra amin’ny fampiasana ny “Puces RFID” sy ny “GPS tracker”, hahafahana mamantatra ny toerana misy ny zavatra na olona iray amin’ny ora rehetra izy ireo amin’izao fotoana izao. Raha ny famaritana tsotsotra, dia fitaovana kely azo haraikitra na hampidirina amin’ny vatan’ny biby na olombelona iray ny “Puces RFID” na “radio-étiquettes”, ka “puces électronique” sy “antenne” amin’ny ankapobeny no mitambatra mandrafitra azy. Teknolojia tahaka izany, ohatra, no katsahina hapetraka amin’ny omby eto amintsika. Mitovitovy amin’izay ihany ny “GPS-Tracker”, fitaovana madinika afaka mamantatra ny misy ny olona iray ao anatin’ny sarin-tany. Ohatra azo hampiasana izany ny fametrahana ao anatin’ny kitapo baben’ny zaza io fitaovana io, hahafaha-manaramaso azy. Afaka mahazo fanairana avy hatrany raha mivoaka ny faritra iray mety tsy ho azo antoka na hampidi-doza izy. Mivoitra ao anatin’ity tetikasa ity araka izany ny fanaraha-maso ny olona na zavatra iray amin’ny alalan’ny teknolojia avo lenta. Ohatra hafa ny fanaraha-maso sy fahazoana fanairana avy lavitra raha toa ka mihoatra ny fetran'ny hafainganam-pandeha voafaritry ny GPS, toy ny hoe misy zaza tokony ho any an-tsekoly, kanefa tsy araka izay zotra sy hafainganam-pandehan’ny fiara. Mampanantena ny IT University, fa hivoaka tsy ho ela ity “application” mifototra amin’ny teknolijia avo lenta ity, ary efa ao anatin’ny andrana izy ireo amin’izao fotoana izao.

Toky R