Fampianarana

Famahana ny olan’ny Seces Asa indray izay hataon’ny minisitra vaovao

Fampianarana
Alakamisy 01 Aogositra 2019

Horaisin’ny minisitry ny fampianarana ambony vaovao, Blanche Nirina Richard, anio ny avy eo anivon’ny sendikan’ny mpampianatra mpikaroka eto

Antananarivo, raha ny fanazavan’ny filohan’ny Seces Tanà, Sammy Grégoire Ravelonirina, nandritry ny fihaonan’ny solontenan’ireo oniversite miisa 12 eto afrika mikaroka momba ny resaka fisorohana sy fitantanana ny loza tetsy amin’ny Colbert Antaninarenina omaly. Miarahaba sy mankahery ny minisitra vaovao amin’ny adidy mavesatra miandry azy ny tenako, hoy ity filoha ity, satria raha ny mikasika ireo fitakiana miisa 7 nataonay dia tsy mbola misy azo tsapain-tanana aloha hatreto ny famahana ny olana. Manantena izahay fa hijery vahaolana maharitra ny fanjakana mba tsy hiverenan’ny olana toy ny fampiatoana fampianarana, hoy izy. 3 volana lasa izay dia miroso amin’ny fanatanterahana ny fanjakana. Ohatra, ny momba ny fikarakarana ny atao hoe “reclassement” dia vahaolana politika no azo fa tsy teknika. Ny Seces anefa efa nanolo-kevitra hoe aleo vitaina 2019 ny ampahany voalohany ary ny taona 2020 ny faharoa. Efa neken’ny praiminisitra fa tokony handeha ho azy io. Efa nekena fa haloa ny trosan’ny Seces amin’ny fanjakana. Ampahany no efa azo. Vonona amin’ny fifampidinihana izahay ary mino fa hahita marimaritra iraisana ahitam-bahaolana, hoy izy.

J. Mirija

Legende: Ny Pr Sammy Grégoire Ravelonirina filohan’ny Seces Sampana Antananarivo