Fahasimban’ny

oniversiten’i Toamasina

Fampianarana
Alarobia 18 Febroary 2026

Nidina ifotony ny Minisitra mpiahy

Vaindohan-draharahan’ny Fitondram-panjakana ny fanarenana haingana ireo fahasimbana nateraky ny rivodoza GEZANI tao Toamasina. Nidina ifotony tao amin’ny Campus Barikadimy ny Minisitry ny Fampianarana Ambony sy ny Fikarohana Ara-tsiansa, Pr RAVONIMANANTSOA Ndaohialy Manda-Vy, afak'omaly 16 Febroary, nijery sy nandrindra ny asa fanarenana. Araka ny tombana dia simba ny ankamaroan’ny fotodrafitrasa toy ny toeram-piasana, ny efitrano fianarana ary ny trano fonenan’ny mpianatra. Napetraka avy hatrany ny laharam-pahamehana amin’ny fanarenana toy ny fanamboarana maika ny "cité universitaire", ny fanarenana ireo efitrano fianarana, ary ny fananganana fotodrafitrasa mateza sy maharitra. Tanjon’ny Minisitera ny hiantoka ny fitohizan’ny taom-pianarana sy ny fiarovana ny mpianatra. Nihaona tamin’ireo tompon’andraikitra notarihin’ny Filohan’ny Oniversite, Pr RAZANAKOLONA Diny, ny Minisitra ka niara-nandinika ireo fepetra maika hapetraka ho famahana izao voina lehibe izao satria dia voakasika avokoa ny mpianatra sy ny mpampianatra ary ny mpandraharaha eo anivon’ny Oniversite. Nitondra teny fampaherezana ho an’ny fianakaviamben’ny Oniversiten’i Toamasina ny Minisitra ary nisaotra manokana ireo mpiara-miombon’antoka sy ireo rehetra naneho firaisankina sy nanome tanana amin’izao ezaka fanarenana izao.
Pati
Légende : Nandritra ny fihaonana tamin'ireo mpianatra !