Fampianarana

ESC ESPIC Manohana ireo tanora hampandroso ny firenena

Fampianarana
Alatsinainy 13 Aogositra 2018

Niampy 50 mianadahy indray ireo tanora teknisiana eto amintsika, mpianatry navoakan’ny sekoly ambony ESC ESPIC.

Nizara ho roa ny sokajin’ny mari-pahaizana natolotra azy ireo ny Sabotsy teo dia ny sokajy hahazoana ny kategoria laharana fahatelo sy ny faha-efatra eo anivon’ny Ministeran’ny asa sy ny asam-panjakana. Nianatra iray sy roa taona izy ireo ka ho an’ireo enina mendrika indrindra dia fantatra fa hotohanan’ity sekoly ambony iray ity ny tetikasany. Anisan’izany ohatra ilay fanamboarana rindram-baiko ( logiciel). Mandritra ny enim-bolana no hanohanan’ny Esc Espic io tetikasa io mba hahafahan’ilay mpianatra nanao fikarohana mivelatra. Aorian’izay kosa dia ho afaka mikopak’elatra ilay mpianatra hangana ny orinasany manokana ka ho afaka hanampy ireo namany mitovy aminy hahafahana miady amin’ny tsy fananan’asa mahazo ny tanora eto amintsika. Tsiahivina moa fa tsy mionona fotsiny amin’ny fampianarana ankapobeny ity sekoly ambony iray ity. Mampianatra ankizy milalao baolina kitra ihany koa izy ireo manomboka eo amin’ny dimy taonany mba hahafahana miaro ny tanora tsy hanaotao foana. Tafiditra ao anatin’izany ny fampianarana azy ireo ny fisafidianana ny asa hataony rehefa any aoriana mba tsy hifanohitra amin’ny lalam-piofanana arahiny. Ankizy madinika mpilalao baolina kitra miisa 40 ihany koa no notoloran’izy ireo mari-pankasitrahana ny faran’ny herinandro teo.

Pati