Fampianarana

EPP Mahavelona Nahazo loka ireo mendrika tamin’ny CEPE

Fampianarana
Zoma 07 Septambra 2018

Ankizy kamboty sy zanaky ny sahirana ara-pivelomana avokoa ny ankamaroan’ireo mpianatry ny sekoly ambaratonga fototra ao Mahavelona.

Am-polony maro izy ireo no indray niatrika ny fanadinana CEPE ny 14 aogositra lasa teo saingy ny 45 ihany no tafita soa aman-tsara. Mba ho valim-pitia ho azy ireo sy hahafahany miatrika ny taom-pianarana vaovao 2018-2019 indray ary dia notoloran’ny orinasam-pifandraisana Airtel fitaovam-pianarana feno izy ireo, omaly. Nahitana kahie, penina…. entina hanamaivanana ny fahasahiranan’ny ray aman-dreny. Nentina nitsidika ny Rovan’i Manjakamiadana ihany koa izy ireo, fitsangantsanganana nofaranana tamin’ny fiaraha-misakafo niaraka tamin’Atoa Maixent Bekangba, tale jeneralin’ny orinasa. Folo taona izao no niarahan’ny Airtel niasa tamin’ny EPP Mahavelona ho fitsinjovana ireo ankizy marefo eny anivon’ny fiarahamonina. Efa hiatrika ny fanadinana Bakalôrea amin’ity taona ity ireo ankizy tao amin’ny taona voalohany nanombohan’izy ireo ny fiaraha-miasany. Tanjon’ny roa tonta ny mba hahafahana mamokatra ankizy sy tanora Malagasy manampahaizana na dia eo aza ny fahasahiranana ho tombontsoan’ny firenena.

Pati