Fampianarana

EPP Mahamasina atsinanana Nahazo dabilio hiatrehana ny CEPE

Fampianarana
Alakamisy 17 Mey 2018

Tena betsaka loatra ireo ankizy taona fahadimy hiatrika ny fanadinana CEPE ao amin’ny EPP Mahamasina Atsinanana no iray kilasy.

Mahatratra 66 isa izy ireo ka voatery nampitomboina ho telo isaky ny dabilio iray no miara-mipetraka raha tokony ho roa. Mba ho fanampiana azy ireo ary dia tonga nanolotra dabilio miisa 30 ho azy 66 mianadahy ireo ny Vivo Energy omaly, fiaraha-miasa niaraka tamin’ny Rotary Club Antananarivo Tsimbaroa. Ny mba hahafahan’ireo mpianatra kely ireo miatrika ny fanadinana CEPE amim-pitoniana no tanjona, indrindra hitazomany ny fifantohany ao anatin’izao fotoana fanaovana famerenana izao. Raha araka ny resaka nifanaovana tamin’ny talen-tsekoly mantsy dia efa ao anatin’ny fotoana fanaovana famerenana tanteraka izy 66 mianadahy ireto ankehitriny. Tsy maintsy ezahina ny hanatsarana ny tontolo iainan’izy ireo isan’andro entina hanatsarana ny voka-panadinana. Saika zanak’olona sahirana ara-pivelomana avokoa mantsy izy ireo ka ny fotoana handehanany any am-pianarana sisa no tena mikaonty noho ny asa fitadiavana hiantsorohan’ireo ray aman-dreniny. Tsiahivina moa fa miisa 465 ireo mpianatra manovo fahalalana eo anivon’ity EPP iray ity ankehitriny sahanina mpampianatra sy mpandraharaha 11 mianadahy. Hankalaza ny faha-70 taona niorenany ny sekoly amin’ny taona 2020 ho avy izao.

Pati