Fampianarana

EPP Antandrokomby Mitaraina ny Ray aman-dReny fa mandoa vola

Fampianarana
Alarobia 07 Oktobra 2020

Raha efa nampahafantarina tamim-pomba ôfisialy fa tsy mandoa sara-pisoratana anarana intsony manomboka amin’ity taom-pianarana vaovao ity ireo mpianatra manovo fahalalana eny anivon’ny sekolim-panjakana dia mbola misy ihany ireo manao izany.

Voakasika manokana ny EPP etsy Antandrokomby, distrikan’Antananarivo Atsimondrano. Raha araka ny fitarainan’ireo Ray aman-dRenin’ny mpianatra mantsy dia tsy avelan’ilay talen-tsekoly mianatra ny zanak’izy ireo raha tsy mandoa 30.000 Ar isanisany. Nanao hetsika nilanja sora-baventy mihitsy izy ireo omaly ho fanoherana izany sy ho fanairana ny Fitondram-panjakana. Nambaran’izy ireo fa ny vola hividianana fitaovam-pianarana aza efa tena manahirana vao mainka hiampy lela-vola 30.000 Ar isaky ny mpianatra indray, indrindra taorian’ny krizy nateraky ny fihibohana ?. Maro moa ireo olona sorena amin’ny fanjakana manoloana ity tranga ity. Aoka hoy izy ireo hipaka hatrany amin’ny isam-baravarana ny fampanantenana hatao no sady arahina naoty fa tsy hatao am-bava fotsiny ihany ialana amin’ny mpanararaotra.

Pati