Fampianarana

EPP ANDOHARANOFOTSY Vita ny asa fanavaozana, notokanana omaly

Fampianarana
Zoma 17 Janoary 2020

Vita tanteraka ny asa fanavaozana ny EPP ao Andoharanofotsy, kaominina Andoharanofotsy,

distrikan’Antananarivo Atsimondrano rehefa nanomboka tamin’ny volana desambra lasa teo. Vokatry ny fifanomezan-tanana teo amin’ny fanjakana tamin’ny alalan’ny minisiteran’ny fanabeazam-pirenena sy ny fampianarana teknika sy ny fondation BOA tarihin-dRtoa Sidika Akbaraly no angady nananana sy vy nahitana izany. Omaly no notokanana tamim-pomba ôfisialy ny fanaovana ity EPP iray ity izay nahitana efitranon-tsekoly vaovao miisa folo miaraka amin’ireo fitaovana rehetra ilaina ao anatiny. Tao anatin’ny hafaliana tanteraka no nandraisan’ireo mpampianatra sy mpianatra ary talen-tsekoly izany. Tena nahatsiaro nijaly mantsy izy ireo teo aloha tamin’ny haratsian’ny fotodrafitrasa nampiasainy. Anisan’ny tena nampanahy mafy azy ireo ilay efitrano iray lehibe eo an-tokotany izay fianaran’ireo ankizy madinika ao amin’ny préscolaire saingy efa nakatona tanteraka noho ny fahanterany. Biriky tany mantsy no nanorenana azy ity. Mindrana trano ao amin’ilay EPP efa nohavaozina araka izany ireo kilonga madinika ao amin’ny présco rehefa hianatra. Tsiahivina moa fa miisa 18 ny mpampianatra ao amin’ny EPP Andoharanofotsy ka ny efatra amin’ireo no mbola FRAM. Manodidina ny 600 isa kosa ny mpianatra. Tsiahivina moa fa EPP roa ihany koa no nohavaozin’ny Fondation BOA any Mampikony ankoatra ny “kits scolaire” efa nozaraina ho ana mpianatra miisa 25.000. Efa nanampy ny mpitondra ihany koa izy tamin’ny alalan’ny fanaovam-baksiny ny ankizy madinika.

Pati