Fampianarana

ENS Ampefiloha Hampita ny «esprit normalien» amin’ny fiarahamonina

Fampianarana
Talata 11 Jolay 2017

Efa miravona ankehitriny ny disadisa nitranga tao amin’ity ivontoerana fampianarana ambony ity, hoy ny talen’ny ENS (Ecole Normale Supérieure) ny profesora Andriambelimanana Henriette.

Nifanome toky hiara-kiasa ao anatin’ny filaminana ihany koa ny mpampianatra sy mpianatra taorian’ny korontana niseho teny an-toerana herinandro vitsy lasa izy, araka ny fanazavany. Vonona tanteraka rahateo ireo mpisehatra rehetra ao amin’ity ivontoerana ity ny hampita ilay antsoina hoe «esprit normalien» manoloana ny fitotongan’ny fanabeazana sy ny firongatry ny korontana eo anivon’ny fiarahamonina Malagasy. Fanatsarana niaraka niainga tamin’ny rafitra LMD (Licence-Master-Doctorat) tao amin’ny ENS Ampefiloha ny fametrahana ny seha-panabeazana olom-banona mba hiainana hatrany amin’ny fahazazana ny fanajana ny fitsipika fifampifehezana. Tontosaina eny an-toerana nanomboka omaly moa ny herinandron’ity sekoly mpampiofana ho mpampianatra mpanabe ity. Anton’ny hetsika ny fampahafantarana bebe kokoa amin’ny besinimaro ny momba io sekoly fampiofanana mpampianatra mpanabe io. Hivoitra hatramin’ny zoma andro farany kosa ny resaka fanabeazana, ny tontolo siantifika ary ny sehatry ny kolontsaina.

Ramano F.