Fampianarana

Distrikan’i Sambava Omaly vao niverina nianatra ny mpianatra

Fampianarana
Zoma 16 Febroary 2018

Omaly vao niverina nianatra avokoa ireo mpianatra any amin’ny distrikan’i Sambava.

Voatery naato mihitsy mantsy ny fampianarana tany an-toerana vokatry ny disadisa nisy teo amin’ireo mpampianatra tapaka karama miisa 400 sy ny DREN ka nanosika iretsy voalohany hamantsika ny biraon’ny DREN rehefa nandeha nitaraina izy ireo ka tsy nahita olona. Tsy nahatanty ny olana mianjady aminy intsony ireto mpampianatra ireto raha araka ny fanazavan-dRatolojanahary Arsene, filoha nasionalin’ny SEMPAMA Nosy, antony nahatonga azy ireo ho tonga tamin’izao famatsihana ny biraon’ny DREN izao. Na izany aza anefa hoy izy dia nahim-pon’ireo mpampianatra ireo tanteraka ny nanao ity hetsika ity fa tsy misy hidiran’ny SEMPAMA. Mbola nitohy tamin’ny famahana io olana nitranga tany Sambava io moa ny SEMPAMA Nosy hatramin’ny omaly. Manao antso avo amin’ny Fitondram-panjakana, indrindra fa ny minisiteran’ny Vola araka izany ity filoha nasionalin’ny Sempama Nosy ity mba hamerina haingana ny karaman’ireo mpampianatra tapaka karama. Ahiana mantsy hoy izy ny hiparitahan’ny hetsiky ny mpampianatra tahaka izao manerana ny Nosy raha tsy misy ny vahaolana maika hatolotra azy ireo. Efa nisy tamin’ireo mpampianatra tapaka karama any an-toerana moa no efa nivaha ny olany.

Pati