Fampianarana

CNaPS - DIDEC Moramanga Nahazo fiofanana ny mpampiasa sy ny mpiasa

Fampianarana
Alakamisy 23 Mey 2019

Mitohy ny fanofanan’ny CNaPS sy ny DINEC ireo tompon’andraikitra eo anivon’ny sekoly katolika ka nampahafantarina momba ny zon’ny mpiasa sy ny adidin’ny mpampiasa ny DIDEC Moramanga nandritra ny 4 andro.

Nitarika ny fiofanana Atoa Rasoanaivo Didier, talen’ny fenitra sy ny fikarohana eo anivon’ny CNaPS foibe. Nahatratra 40 ireo mpiofana nahitana ny vondron’ny ray aman-drenin’ny mpianatra, ny mpitantana sekoly. Nampahalalaina azy ireo ny andinin-dalàna momba ny fiahiana ara-tsosialy, ny fifanarahana arak’asa, ny kazarana tombontsoa omen’ny CNaPS ho an’ny mpiasa sy ny vady aman-janany. Ao ny fanampiana ny fianakaviana, ny loza sy aretina vokatry ny asa ary ny fisotroan-dronono. Nambaran’ny Sekretera jeneralin’ny vaomiera Episkopalin’ny fanabeazana katolika Père Jules Ranaivoson fa ny ray aman-dreny no mandoa ny vola ho an’ireo mpanabe ka tsara ry zareo mahalala ny lalàna momba izany. Nanamafy ny avy amin’ny CNaPS fa rehefa voakarakara ny mpanabe dia mazoto mampianatra, ary mifantoka bebe kokoa amin’ny asa sahaniny. Hahita vokatsoa, araka izany, ny mpianatra sy ny ray aman-dreny ary ny sekoly. Ny mpanabe kosa tsy ho very zo ary higoka ny tombontsoa ao amin’ny CNaPS manomboka any am-bohoka ka hatramin’ny fahafatesany raha feno avokoa ny fepetra. Ny tanjona moa dia ny haharesy lahatra ny rehetra fa zava-dehibe ny fananana fiahiana ara-tsosialy.

RTT