Fampianarana

Cisco Antananarivo Renivohitra Efa nahazo “kits scolaires” avokoa ny mpianatra

Fampianarana
Alakamisy 07 Desambra 2017

Efa tapitra nahazo ilay “kits scolaires” avy amin’ny filoham-pirenena mivady avokoa ireo mpianatra eo anivon’ny fari-piadidiam-pampianarana Antananarivo Renivohitra, hoy Rakotozafy Ramasy Harisoa, tompon’andraikitra voalohany eo anivon’ity Cisco iray ity, omaly.

Tany am-pianarana no nozaraina izany ho an’ireo mpianatra madinika noho ny hamaroan’ireo olona tonga teny amin’ny Coliseum Antsonjombe. Teny Antsonjombe kosa anefa no naka ny anjarany ireo mpianatra eny anivon’ny CEG miisa 15 eto an-drenivohitra izay miisa 19.810. Mikasika ny fizotry ny fampianarana amin’izao telo volana voalohany izao dia nomarihiny manokana fa tena mandeha tsara ho an’ny fari-piadidiam-pampianarana tantanany. Samy manana ny fanapahan-kevitra raisiny ny sekoly tsirairay na hampanao fanadinana telo volana voalohany ny mpianatra amin’ity desambra ity na fitsapam-pahaizana fotsiny ihany. Ny tsy maintsy hiraisana dia aorian’ny fetin’ny Noely sy ny faran’ny taona vao handray ny bulletin ny mpianatra. Ny 23 desambra ho avy izao moa no hivoaka amin’ny fialan-tsasatry ny fetin’ny noely sy ny faran’ny taona ny mpianatra rehetra ary hifarana ny 3 janoary taona 2018.

Pati