Fampianarana

CEG ANOSIBE Mpiadina CEPE miisa 95 tsy tonga

Fampianarana
Alarobia 28 Aogositra 2019

Nahatratra 95, omaly ireo mpiadina voasoratra anarana tsy tonga nanatrika ny fanadinana CEPE ho an’ny CEG Anosibe, fari-piadidiam-pampianaran’Antananarivo Renivohitra.

Teo am-piantsoana ny maraina mihitsy izy ireo dia efa tsy tonga ka lasa 2.432 sisa ireo nanatrika raha miisa 2.527 ireo mpiadina voasoratra anarana. Nizotra tamim-pilaminana ny fanadinana, hoy ny lehiben’ny foibem-panadinana Andrianantenaimanantena Davidson. Tsy nisy ny ankizy narary na nanana olana hafa hatramin’ny fotoana nandalovanay teny an-toerana. Nomarihiny manokana fa nahatratra valo ny polisy tonga niambina ity foibem-panadinana iray ity omaly raha roa foana no nahazatra azy ireo hatramin’izay. Ho an’ny fanadinana CEPE manerana ny Nosy kosa dia fantatra fa nizotra tamim-pilaminana izany. Tao amin’ny CEG Ratsimilaho Toamasina no nanokatra izany tamim-pomba ofisialy Rtoa Volahaingo Marie Therese, minisitry ny fanabeazam-pirenena sy ny fampianarana teknika omaly maraina sady nisantatra ny fanokafana ireo sobika nisy ny laza adina ihany koa. Mikasika ny tambin-karaman’ireo mpampianatra tsy mbola voaloa dia nomarihin’ity minisitra ity fa efa eo am-panomanana izany izy ireo ka raha vantany vao vonona dia zaraina amin’ireo mpampianatra tsirairay avy.

Pati