Fampianarana

Akanin’ny marenina 67 HA 80 % ny salam-pahafaham-panadinana CEPE

Fampianarana
Alakamisy 06 Jolay 2017

Tafakatra 80 % ny salam-pahafaham-panadinana CEPE tamin’ity taona ity ho an’ny Akanin’ny Marenina etsy 67 ha raha 50 % tamin’ny taon-dasa.

Mpiadina 13 tamin’ireo 16 no afaka raha 8 tamin’ireo 16 isa tamin’ny taon-dasa. Fandresena lehibe ho an’ny AKAMA ny vokatra azony, raha araka ny fanazavan’ny taleny Andriamampianina Rivo izay mbola ezahin’izy ireo hotohizana hatrany. 13 kosa ireo mpiadina miatrika ny fanadinana BEPC ankehitriny izay natokana amina efitranom-panadinana iray mihitsy sady mbola nomen’ny fanjakana mpampianatra mandika ny laza adina amin’ny alalan’ny tenin’ny tanàna ihany koa. Mbola hojerena manokana tahaka izany ihany koa ireo mpianatr’izy ireo hiatrika ny fanadinana Bakalôrea miisa sivy mianadahy. Tsiahivina moa fa ireo ankizy manana olana ara-pihainoana ihany ary nahazoana taratasy manamarina izany avy amin’ny dokotera no azon’ny AKAMA raisina. Ny 2 oktobra ho avy izao izy ireo no hanomboka ny taom-pianarana 2017-2018 raha herinandro mialoha io daty io no hahafahana manavao ny fisoratana anarana.

Pati