Fampianarana

Partagé sur :
• facebook

Vao maraina dia efa nameno ny kianjabe nikasana hanaovana ny adina ara-panatanjahantena tao Brickaville ireo mpampianatra mpikambana eo anivon’ny Sempama any an-toerana.

Tonga tao anaty kianja ihany koa ireo mpampianatra ara-panatanjahantena vonona hanao ny adina ho an’ireto mpianatra hanala ny bakalorea. Nanomboka tamin’ny teo amin’ireto samy mpampianatra ny olana voalohany, satria amin’ny Sempama mitokona dia mpamadika ny tolona sy ny mpampianatra namany ireto mpampianatra ireto. Nifandamina teo ny roa tonga saingy tsy nilefitra ireto mpitokona. Nampiasa hery ny zandary saingy tsy nihontsona sy tsy nanaiky lembenana ireto Sempama Brickaville. Vokany, tsy raikitra ny fanadinana satria tsy niala teo ambony kianja ireo mpampiantra mitokona raha tsy tamin’ny 3 ora tolakandro. Voalaza fa hahemotra amin’ny fotoana manaraka izany ho an’ny distrikan’i Brickaville. Saika tonga tamin’ny fifampikasihan-tanana kosa ny teo amin’ny samy mpampianatra tao amin’ny Lycée J Rabemananjara Toamasina omaly maraina. Amin’ireto mpampianatra mitokona dia mpamadika sy mpamosavy malemy ireto namany nandray ny asany nefa ny tolona niarahana tsy mbola nivaly sy ataon’ny fanjakana tsinontsinona. Niditra an-tsehatra nandamina ny raharaha ny Emmo-Sécurité ka nandroaka ireto Sempama nitokona sy nilanja sorabaventy, ary niaro kosa ireto mpampianatra vonona nandray ny asany. Raha tamin’ny 7ora no tokony ho nanombohan’ny adina dia tsy tontosa raha tsy tamin’ny 8ora sy sasany tany ho any. Nilamina tsy nisy olana kosa ny tao amin’ny Ceg Ratsimilaho Tanambao V. Tonga ara-potoana ny mpianatra sy ny mpanadina. Nisy ihany ireo Sempama nihaodihaody nanodidina saingy tsy nahasakana ny fanombohan’ny adina noho ny Emmo-Sécurité niaro mafy azy ireo.

Rakoutou

Tia Tanindrazana

Samia mijoro ho an'i Gasikara.