Fahasalamana

Vovoka fotsy nanempotra mpianatra Mandeha ny fanadihadiana ataon’ny Institut pasteur

Fahasalamana
Alarobia 11 Aprily 2018

Efa niverina amin’ny laoniny nanomboka omaly ny fampianarana eo anivon’ilay lisea iray nahitana vovo-javatra nanempotra mpianatra miisa 14 tany amin’ny distrikan’Arivonimamo ka voatery nampidirina hopitaly ireto farany.

Efa nivoaka ny hopitaly daholo ihany koa ny mpianatra, raha araka ny fanazavan’Atoa Tsitoara Serge Thierry, talen’ny fampitam-baovao sy ny teknolojia eo anivon’ny minisiteran’ny fanabeazam-pirenena. Nambarany fa nisy ny fepetra noraisin’ny fari-piadidiam-pampianarana any an-toerana ho fiarovana ny ain’ny mpianatra. Nohatevenina ny fiambenana ny sekoly ka anisan’ny jerena manokana amin’izany ireo olona mivoaka sy miditra. Mandeha tsy mitsahatra ihany koa ny fanaraha-maso ny efitrano fianarana tsirairay avy. Mikasika ilay vovo-javatra fotsifotsy nitera-doza manokana moa dia fantatra fa mbola eo an-dalam-panaovana fanadihadiana ny mikasika izany ny Institut pasteur de Madagascar, taorian’ny nampiakaran’ny tompon’andraikitry ny fahasalamana any an-toerana teto an-drenivohitra. Andrasana izay tena vaovao marim-pototra mikasika ity vovon-javatra ity.

Pati