Fahasalamana

Toamasina Olona 2 indray no matin’ny pesta

Fahasalamana
Talata 26 Septambra 2017

Efa nandalo tany Toamasina ny ekipan’ny “institut pasteur” sy ny ekipan’ny “OMS” Antananarivo, nanao fanadihadiana ifotony sy nanao fitiliana ny tena zava-nisy marina ny herinandro lasa iny.

Ny faran’ny herinandro teo dia nisy olona roa indray matin’ny pesta amin’ny tratra. Raha ny fanazavana azo, ny zoma lasa teo no nisy olona 30 taona niditra hopitaly tao Morafeno, Rehefa nozahan’ny mpitsabo dia fantatra fa pesta amin’ny tratra no nahazo azy ka nalefa haingana teny amin’ny hopitaly be Toamasina. Maty izy ny sabotsy ary efa nofantsihana tsy azo andraisana marary ny efitrano nandraisana azy teo anivon’ny hopitalin’i Morafeno. Ny faharoa kosa olona 25 taona avy hatrany dia nentina teo anivon’ny sampana mpitsabo ny aretin-tratran’ny hopitaly be. Ny sabotsy ihany koa dia maty izy. Efa samy nalevina amin’ny fepetra ara-pahasalamana avokoa izy roa ireo. Tamin’izao tranga izao dia tsy nandray ny antso an-tariby nataon’ny mpanao gazety taminy mihitsy ny talem-paritry ny fahasalamana atsinanana, raha nakana vaovao sy nangatahana mba hamoaka ny heviny. Ireo mpîtsabom-panjakana nanontaniana kosa dia manilika ny fanazavana any amin’ny talem-paritra avokoa, teo kosa ireo milaza ny tsy mahalala noho tsy fitiavan’izy ireo hanome vaovao “marina” ny mpanao gazety.

Rakoutou