Fahasalamana

Tazomoka any Iakora Nahitam-bokany ny paikady nampiasaina

Fahasalamana
Talata 30 Jona 2020

Nahitam-bokany ny ady amin’ny tazomoka any amin’ny distrikan’i Iakora. Nanomboka ny volana mey lasa teo mantsy dia maro ireo ezaka sy paikady

napetrak` ireo mpitsabo sy mpiasan’ny fahasalamana rehetra any an-toerana entina hamongorana ifotony an’ity aretina tazomoka ity. Nisy ny fizarana fanafody ho an’ireo mponina, na ny marary na ny salama entina hisorohana ny aretina. Namendrahana fanafody avokoa ireo tobim-pahasalamana fototra na CSB miisa 11 ao anatin’ity distrika ity. Ankoatra izay dia natao mafy mihoatra ny tokony ho izy fanentanana ny mpiara-belona rehetra mba hamonjy tobim-pahasalamana haka fanafody sy hitsabo tena any amin’ireo CSB raha vao misy fambaran’aretina. Nisy moa ny fivoriana nentina namaritana ireo paikady napetraka ireo, sy ny hanohizana izany hatrany ho famongorana tanteraka ny aretina tazomoka any an-toerana. Nentanina ihany koa ny mponina, indrindra ny vehivavy bevohoka sy ny zaza latsaky ny 5 taona mba hanao lay amin’ny alina ary tsy hampiasa ny lay amin’ny antony hafa, ankoatra ny maha fiarovana azy amin’ny aretina tazomoka.

Marigny A.