Fahasalamana

Sehatra ara-pahasalamana Tsy maharaka ny fitombon’ny mponina ny fivoarany

Fahasalamana
Alarobia 18 Martsa 2020

Nampahafantarina tetsy amin’ny Hotely PANORAMA Andrainarivo omaly ny mahakasika ny fanadihadiana momba ny fitombon’ny mponina sy ny fahasalamana (EDSMD) eto Madagasikara.

Mifanindry an-dalana ary tsy azo sarahana ny fampiroboroboana ny sehatra ara-pahasalamana sy ny fitombon’ny vahoaka Malagasy. Efa fanin-diminy amin’ny fanadihadiana natao eto amin’ny firenena Malagasy io hatramin’ny taona 2008. Amin’ity taona ity kosa dia handrakotra ny faritra 22 izany ary hanaovana fanadihadiana amina tokantrano miisa 21000. Hanontaniana amin’ity fanadihadiana EDSMD ity ny mahakasika ny fananana anaka sy ny fandrindram-piterahana. Eo ihany koa ny fahasalaman’ny reny sy ny zaza ary ireo aretina tahaka ny tazomoka, ny tsimokaretina VIH-SIDA hatramin’ireo aretina mpahazo ny tanora noho ny firaisana ara-nofo tsy voaaro. Tompon’antoka amin’ity fanadihadiana ity ny INSTAT ary vatsian’ny sampandraharaha Amerikanina misahana ny fampandrosoana Iraisam-pirenena (USAID) vola izany miaraka amin’ny tahirin’ny firenena Mikambana momba ny mponina (FNUAP) sy ny Vondrona Iraisam-pirenena miaro ny ankizy sy ny zony (UNICEF).

Tsirinasolo