Fahasalamana

Saosisy karakaraina eny Ikopa Mety hitarika amin’ny fahapoizinana ara-tsakafo

Fahasalamana
Alarobia 23 Aogositra 2017

Tranga iray tsy zoviana amintsika intsony ny fanasana tsinain’omby hanaovana saosisy eny amin’ny ranon’Ikopa mandalo eny ambany tetezan’Anosizato sy Ampasika iny.

Saika isan’andro no ahitana izany tranga izany eny an-toerana noho ny fisian’ireo toeram-pamonoan’omby eny amin’ireo faritra roa ireo. Tena zava-doza ho an’ny fahasalamam-bahoaka anefa ny fanaovana izany. Raha araka ny fanazavan’ny dokotera Fidy Bariniaina mantsy dia rano tsy madio ny rano mandeha. Mety hanasan’ny olona tongotra izany, hanasany lamba, hidiovany, raha misy amin’ireo trano fivoahana eny amin’ireo faritra ireo ihany koa no mivarina anaty rano ny malotony. Midika izany fa betsaka ny aretina mety hoentiny manomboka amin’ny aretin-kibo, izay mety hiafara amin’ny fahapoizinana ara-tsakafo mihitsy sy ny aretina hafa. Nomarihin’ity dokotera iray ity moa fa tokony hisy hatrany rano madio azo antoka entina hikarakarana ny sakafo ao an-tokantrano mialoha ny hahandrona azy. Mikasika ilay feo mandeha fa matin’ny hafanana 180 °C ny mikraoba amin’ny sakafo ka tsy misy atahorana dia nomarihin’ny dokotera Fidy Bariniaina fa mety tsy ho masaka tsara ny sakafo indraindray noho izany tokony hohajaina hatrany ny fahadiovany.

Pati