Fahasalamana

Partagé sur :
• facebook

Nampisahotaka ny ray aman-dreny nanan-janaka madinika ao Toamasina omaly ny fipariahan’ny resaka fa misy mpitsabo mitety fokontany miaraka amin’ny miaramila ary manery ny tsy maintsy hanaovana vaksiny ny ankizy ho fiarovana amin’ny valanaretina pesta.

 Nihorohoro kosa ny ankamaroan’ny ray aman-dreny, ka nanitrika sy nanidy zanany tao an-trano, hany ka tsy nahitana ankizy nilalao intsony ny lalam-pasika samihafa tao Toamasina. Samy nanana ny nambarany avy ny teny amin’ny fokontany vitsivitsy. Tao ny nilaza fa efa niatrika fanaovana vaksiny atao an-tery ka niteny fa nisy mihitsy ny zaza sy ankizy torana. Tao kosa no nanambara fa nisy mihitsy ny maty. Tonga tany am-poto-tsofin’ny prefen’i Toamasina Benandrasana Cyrille ny resaka, ka nandefa mpitandro ny filaminana nanara-maso sy nanamarina izany avy hatrany izy. Rehefa raikitra anefa ny fidinana ifotony dia tsy nisy akory ireo sahy nijoro vavolombelona amin’ny tena fahamarinan’ilay toe-javatra nampisahotaka. Noho ny tahotra ve sa tsaho niniana nahely ho fanakorontanana ny saim-bahoaka ? Mandeha ny fikarohana ataon’ny mpitandro filaminana sy ny fampitandremana ireo mpanely tsaho sy manao sangy ratsy momba ity fisiana vaksiny lazaina fa miaro amin’ny pesta atao an-tery ity. Tsy misy vaksinin’ny pesta eto amintsika ary tsy misy hetsika manokana fanaovam-baksinin’ny pesta eto Toamasina, hoy ny prefe. Marihina fa tonga hatrany Brickaville ity resaka ity, ka hatramin’ny sekoly aza nihidy avokoa omaly. Ireo ekipa ara-dalàna mpanao fanisam-bahoaka araka ny fandaharam-pirenena indray no voaendrikendrika, toy ny niseho tao amin’ny Toby fitehirizam-panafody ao Analakininina. Nosokafana nanomboka omaly ny laharana maitso 905, hiantsoan’ny olona raha misy fangataham-baovao sy antso mikasika ny pesta. Finday miisa 5 mihitsy no natokana ho amin’izany mba hisorohana ny fahasarotana.

Rakoutou

Tia Tanindrazana

Samia mijoro ho an'i Gasikara.