Fahasalamana

Paosin-dra eny amin’ny HJRA Tsy maharaka ny filàn’ny marary sy ireo tra-doza intsony

Fahasalamana
Talata 05 Martsa 2019

Tsy maharaka ny filàn’ireo marary sy ireo mila fandidiana maika intsony ny tahirin-drà etsy amin’ny « Centre national de transfusion sanguine » etsy amin’ny hôpitaly HJRA Ampefiloha amin’izao raha ny fantatra.

Noho ny fihenan’ireo mpanome rà maimaim-poana no antony mahatonga izany, nefa ny filàna tsy mitsaha-miakatra isan’andro. Raha tsiahivina tokoa mantsy dia mahatratra 35.000 isan-taona ny paosin-drà ilaintsika manerana ny Nosy ka ny 20.000 paosy amin’ireo dia lany eto Antananarivo avokoa. Hamonjena ireo vehivavy saro-piterahana ka very rà be loatra, ireo ankizy lasibatry ny aretina homamiadana ary koa ireo tratry ny lozam-pifamoivoizana no tena handaniana izany 20.000 paosy izany raha manodidina ny 120 paosy isan’andro kosa ny filàna raha kely. Miantso ireo tsara sitra-po rehetra vonona hanome rà hanavotana ny ain’ny mpiara-belona araka izany ireo tompon’andraikitra eo anivon’ny CNTS mba ho avy hanatona azy ireo. Olona ampy taona izany hoe : 18 ka hatramin’ny 60 taona no ilaina amin’izany, ampy torimaso tsara, milanja 50 kg raha kely indrindra tsy misy aretina mitaiza ary avy nisakafo ara-dalàna. Tsy afaka manome rà kosa ny vehivavy tonga fadim-bolana na mampinono.

Pati