Fahasalamana

Olona mamono, mandatsak’aina, Azo lazaina ho marary saina feno, hoy ny manampahaizana

Fahasalamana
Alarobia 06 Jona 2018

Tranga tsy nampoizina maro no niseho teny anivon’ny fiarahamonina tato ho ato.

Anisan’izany ny famonoana olona akaiky azy izay miafara tamin’ny fahafatesana. Vao omaly dia zazavavy kely iray vao efa-taona monja no maty novonoin-dreniny teny Atsimondrano. Ankoatra ny fahantrana sy ny adim-piainana izay miteraka aretin-tsaina, hoy Razafindrakoto Tatamo, manampahaizana manokana momba ny psychologie sociale sy ny fifandraisana eto amintsika dia anisan’ny antony mahatonga izany ihany koa ny fahatanterahan’ilay tenin’ny Tompo ao anaty Baiboly ny amin’ny hiavian’ny andro farany. Mila miorina amin’ny finoana ny olona iray hahafahany mandamina ny sainy satria ny saina no harena voalohany ho an’ny olombelona fa tsy ny volabe na ny fiara. Miankina amin’io saina io avokoa ny zava-drehetra. Anisan’ny ohatra noraisiny ny tsy fahazakan’ny olona iray ny zava-mitranga ao anatina tontolo misy azy, toy ny fitiavana, ny fianakaviana … Vahaolana aroson’i Tatamo Razafindrakoto ny fandaminana ny saina mba hahazoana fiadanana, fijaliana, filaminana ary korontana. Manampy izay ny tokony hananan’ny olona ihany koa ilay kolontsain’ny fanekena mba hananany hasambarana. Ekena izay zava-mitranga ary katsahina izay mahasoa mba tsy hanenenana.