Fahasalamana

Partagé sur :
• facebook

Hanatanteraka fihaonambe fanindroany ireo mpikambana eo anivon’ny orinasa

Mpitsabo Malagasy FITRAMA amin’ny alahady ho avy izao, hamaritan’izy ireo indray ny ho aviny. Ankoatra ny fifampizarana traikefa ho enti-manatsara ny asa hatrehina dia hisy ihany koa ny fifanoroana amin’ny fikarakarana ny antontan-taratasy mba hidirana amin’ny sehatry ny ara-dalana hahazoana fahazoan-dalana avy amin’ny Ministera. Nomarihin-dRafanomezantsoa Jean Nirina moa fa ny mpitsabo nentim-paharazana dia miainga eny anivon’ny Fokontany sy ny kaominina. Toraka izany koa ny fiaraha-miasa amin’ireo mpitsabo eny ifotony. Ny olona sitrana hoy izy no vavolombelona hahafahan’ny mpitsabo iray manangana ny toeram-pitsaboana hanehoany fa tena mpitsabo nentim-paharazana izy. Manana tarehimarika mifandraika amin’izany izy ireo. 95 %-n’ireo marary tonga nanatona azy no efa sitrana, porofo mivaingana entiny hangatahana fahazoan-dalana feno eny anivon’ny Ministeran’ny Fahasalamam-bahoaka. Hodinihina mandritra izany ihany koa ny fanatanterahana ilay fambolen-kazo goavambe hotanterahina any amin’ny PK 67, lalam-pirenena fahaefatra manomboka ny 26 ka hatramin’ny 30 Desambra ho avy izao. Ireo hazo hanaovana fanafody no tena omena vahana amin’izany toy ny ravintsara, ny mandrava sarotra, ny andramena,….. Nomarihin-dRafanomezantsoa Jean Nirina moa fa efa mpikambana ao anatin’ny ASTRAMA sy ny ANTM izy ireo. Manana patanty sy mandoa hetra ara-dalana ihany koa. Ho avy tsy ho ela araka izany ny fanatonany mivantana eny anivon’ny ministera ho fanandratana ny maha-Malagasy.

Pati

Tia Tanindrazana

Samia mijoro ho an'i Gasikara.